L Cunsëi de Chemun de Urtijëi à dat pro l Program de svilup cumenel per l teritore y la cuntreda (PSCTC) tla senteda ai 10 de juni 2026 cun duc a una. Chësc program ie n strumënt de planificazion per l svilup dl teritore y dla cuntreda dl Chemun, che trata dantaldut dla tematiches dl nridlamënt, dla cuntreda, dla mubiltà y dl turism y che vel nfina l 2040. Per uni una de chësta tematiches à l Chemun nciarià n esperta dl ciamp che ova la ncëria de abiné mesures per l Chemun per tenì ite i ubietifs de scunanza dl ambient dla provinzia. Na grupa de lëur de 24 persones cun reprejentanc de duta la frazions politiches, reprejentanc dla lies y vel ulenter à sustenì i tecnicri tla elaburazion dl PSCTC te 15 sentedes.
Un di lëures zentrei dl program de svilup cumenel ie la definizion dla spersa de nridlamënt, n cunzet nuef che l ne fova nchinamei mo nia. La spersa de nridlamënt (per talian “area insediabile”) tol ite duc i raions abitei che ie bele ncueicundì tl plan urbanistich cumenel y sëuraprò sperses che pudëssa, ti proscims 15 ani, deventé raions abitei. L Chemun arà pona de plu cumpetënzes per dut ciche suzed laite te chësta spersa de nridlamënt y puderà tò dezijions che ne messerà nia plu unides dates pro dala Provinzia.
Co iesen pa ruvei ala pruposta dla spersa de nridlamënt data pro dal Cunsëi de Chemun?
N ie piei via cialan tan de cuatieres nueves che sarà de bujën ti proscims 15 ani n basa al svilup dla populazion y dla cumpëida de families aldò dla previjions dl Astat. Aldò di conc dl Astat iel nfina l 2040 de bujën a Urtijëi de bën 513 cuatieres nueves. N fej cont che na pert de chisc iesen boni de abiné te raions che ie bele tl plan urbanistich y te cuatieres che ie ncuei uec. Per l rest, che fej ora passa 350 cuatieres, fovel da abiné sperses de prësciapuech 65.000 m². Chësc fova n duvier nia saurì, ajache savon che Urtijëi ie te na valeda scialdi strënta y che la lerch ie puecia. N à cialà de abiné sperses l plu daujin al luech che la va, ulache la nfrastrutures ie bele, almanco n pert, prejëntes y ulache l trasport publich possa unì permez. Da dì iel che raions nueves muessa, aldò dla lege provinziela, for taché pra n raion ejistënt. N à nce cialà de nia ti n tò grunt a paures atives.
Da auzé ora iel che tla sperses che ruva ite da nuef tla spersa de nridlamënt ne possen mo nia frabiché. Permò cun l Program cumenel per l teritore y l a cuntreda (ex plan urbanistich) unirà, danter la sperses dedite tla spersa de nridlamënt, ativà na spersa al iede, aldò dla dumanda che sarà, pian via cun chëles plu adatedes.
Co vala pa inant?
Do l’apruvazion da pert dl Cunsëi de Chemun iel mo de bujën dl'autorisazion definitiva da pert dla Jonta provinziela. L Chemun spera che chësta vënie a s’l dé l plu prësc che la va. Daldò possen scumencé a lauré ora l Plan Cumenel per l teritore y la cuntreda (ex plan urbanistich). Cun chël possa l Cunsëi de Chemun autonomamënter fé deventé n toch de grunt che ie dedite tla spersa de nridlamënt grunt da frabiché. L ne ie nia plu debujën dl'autorisazion dla Provinzia y nsci se scurtësc i tëmps dassënn.
Sota chësc link pudëis ciarië ju la documentazion dl program data pro dal Cunsëi de Chemun:
https://sharing.gvcc.net/pickup?claimID=n7CVAbDE26USPgM7&claimPasscode=seESGUXMYkgPQVTt
